Kaixomundua-eus hezkuntza-proiektuaren helburua webguneak sortzen ikasiz, gaitasun digitalen ezagutza eskola-komunitatean sustatzea da. Horrez gain, eduki digitalak euskaraz sortzea ere sustatu nahi da.
Parte hartzen ari diren ikasleak webgune erreal bat sortzen ari dira praktikan oinarritutako lan motibatzaile baten bidez, eta kontsumitzaile digital izatetik sortzaile digital izatera pasako dira. Gainera, trebakuntza teknologikoa behar duten irakasleen prestakuntza ere indartu nahi du lehiaketak.
2018 – 2019 ikasturtean abiatu dugun edizioa proiektu pilotua da eta parte-hartzea mugatua da. Edizio-pilotu honetan 4 ikastetxetako 100 ikasle-talde ari dira lanean. Hauek dira lanean ari diren ikastetxeak: Lekeitio BHI, Ondarroa BHI, Egibide (Gasteiz), eta Arizmendi Ikastola (Debagoiena).
2019ko irailetik aurrera irekiko zaio proiektua eskola komunitate osoari. Hala ere, webgunea publikoa da eta sortutako materiala eta bideo-tutorialak guztion eskura daude.
Kaixomundua.eus PuntuEUS Fundazioaren proiektua da eta Eusko Jaurlaritzaren Kultura eta Hizkuntza Politika Sailaren, Euskaletelen eta Dinahosting-en laguntza du.
